تفصیلات کے مطابق پاکستان میں پاکستان ٹیلی ویژن پر اردو زبان میں نشر ہونے والے اور تہلکہ مچا دینے والے ارطغرل غازی ترکش ڈرامے میں دوآن ایلپ کا کردار نبھانے والے جاوید جیتن گُنیر نے خبر رساں ادارے سے گفتگو کرتے ہوئے پاکستانی مداحوں کے لئے پیغام دیا ہے۔ جس میں ان کا کہنا تھا کہ میں پاکستان کو اپنا دوسرا گھر تصور کرتا ہوں اور جلد ہی پاکستان کا دورہ کروں گا۔
خبر رساں ادارے سے گفتگو کرتے ہوئے اپنے ویڈیو پیغام میں ان کا کہنا تھا کہ ارطغرل غازی کے پاکستان ٹیلی ویژن پر نشر ہونے کے بعد ناظرین کی جانب سے ملنے والے پیار اور محبت پر میں پاکستانیوں کا بے حد مشکور ہوں۔ کیونکہ انہیں یہ جان کر بہت خوشی ہوئی کہ پاکستانیوں کی جانب سے ارطغرل غازی ڈرامے پر بہت اچھا اور مثبت رسپانس آرہا ہے، جو کہ میرے لیے باعث فخر ہے۔
ایک سوال کا جواب دیتے ہوئے ان کا کہنا تھا کہ جس طرح سے پاکستانی ترکی کو اپنا دوسرا گھر سمجھتے ہیں۔ اسی طرح سے میں بھی پاکستان کو اپنا دوسرا گھر سمجھتا ہوں کیونکہ میں نے اپنے پاکستانی دوستوں سے یہی سب کچھ سیکھا ہے۔
جاوید جیتن گُنیر نے اپنے ویڈیو پیغام میں بمشکل اردو زبان میں پاکستانی مداحوں کے لیے ایک پیغام دیا کہ ” وہ جلد پاکستان آئیں گے، تمام پاکستانی اپنا خیال رکھیں اور ارطغرل غازی دیکھتے رہیں”۔
جاوید جیتن گُنیر کا خبر رساں ادارے سے گفتگو کرتے ہوئے کہنا تھا کہ ارطغرل غازی کے پہلے سیزن کی شوٹنگ سے قبل 6 ماہ تک مجھے تلوار بازی نہیں آتی تھی۔تاہم چھ ماہ کی جدوجہد کے بعد میں نے تلوار بازی پر عبور حاصل کر لیا ہے۔
